ਲੁਧਿਆਣਾ,11 ਫਰਬਰੀ ( ਪ੍ਰਿਤਪਾਲ ਸਿੰਘ ਪਾਲੀ )- ਪਰਮ ਸੰਤ ਬਾਬਾ ੁੱਚਾ ਸਿੰਘ ਜੀ ਵਲੋਂ ਸਿਰਜਿਤ ਜਵੱਦੀ ਟਕਸਾਲ ਦੇ ਮੌਜੂਦਾ ਮੁਖੀ ਸੰਤ ਗਿਆਨੀ ਅਮੀਰ ਸਿੰਘ ਜੀ ਦੀ ਪ੍ਰੇਰਨਾ ਨਾਲ ਮਾਘ ਮਹੀਨੇ ਦੇ ਅੰਤਲੇ ਦਿਨ ਦੇ ਦੂਜੇ ਪੈਹਿਰ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਅੰਗ 1168 ਤੋਂ 1196ਤੱਕ, ਛੇ ਰੁੱਤਾਂ ਵਿੱਚੋਂ ਪਹਿਲੀ ਤੇ ਸਭ ਤੋਂ ਲੰਬੀ ਰੁੱਤ, 31ਰਾਗਾਂ ਵਿੱਚੋਂ 25ਵੇਂ ਰਾਗ “ਬਸੰਤ ਰਾਗ” ਅਧਾਰਿਤ ਬਸੰਤ ਰਾਗ ਦਰਬਾਰ ਕਰਵਾਇਆ ਗਿਆ। ਜਿਸ ਦੀ ਆਰੰਭਤਾ ਗੁਰ ਸ਼ਬਦ ਸੰਗੀਤ ਅਕੈਡਮੀ ਦੇ ਹੋਣਹਾਰ ਵਿਿਦਆਰਥੀ ਭਾਈ ਭਰਤ ਸਿੰਘ ਨੇ ਬਸੰਤ ਰਾਗ ਅਧਾਰਿਤ ਸ਼ਬਦ ਕੀਰਤਨ ਨਾਲ ਹੋਈ। ਜੁੜੀਆਂ ਸੰਗਤਾਂ ਸਨਮੁੱਖ ਗੁਰਮਤਿ ਦੀ ਰੌਸ਼ਨੀ ਵਿੱਚ ਬਸੰਤ ਰਾਗ ਪ੍ਰਥਾਏ ਵਰਣਨ ਕਰਦਿਆਂ ਸੰਤ ਗਿਆਨੀ ਅਮੀਰ ਸਿੰਘ ਜੀ ਮੁਖੀ ਜਵੱਦੀ ਟਕਸਾਲ ਨੇ ਬਸੰਤ ਰਾਗ ਦਰਬਾਰ ਕਰਵਾਉਣ ਦੇ ਮੰਤਵ ਅਤੇ ਉਦੇਸ਼ ਦੇ ਨਾਲ-ਨਾਲ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਗੁਰੂ ਸਾਹਿਬ ਜੀ ਨੇ ਮਨੁੱਖੀ ਹਿਰਦੇ ਨੂੰ ਚੜ੍ਹਦੀ ਕਲਾ ਦਾ ਮਾਰਗ ਦਰਸਾਇਆ ਹੈ। ਬਸੰਤ ਰੁੱਤ ‘ਚ ਬਾਹਰਲੀ ਬਨਸਪਤੀ ਦੇ ਮੌਲਣ ਵਾਂਗ ਹਿਰਦਿਆਂ ਨੂੰ ਵੀ ਮੌਲਣ ਤੇ ਜੋਰ ਦਿੱਤਾ। ਇਸ ਰੁੱਤ ਦੇ ਹਵਾਲੇ ਨਾਲ ਪਰਮੇਸ਼ਰ ਨਾਲ ਜੁੜਨ ਦਾ ਸੁਨੇਹਾ ਦਿੱਤਾ। ਬਾਬਾ ਜੀ ਨੇ ਜੋਰ ਦਿੰਦਿਆਂ ਸਮਝਾਇਆ ਕਿ ਗੁਰੂ ਸਾਹਿਬ ਜੀ ਰੁੱਤਾਂ ਨੂੰ ਮਹਾਨਤਾ ਨਾਲੋਂ ਗੁਰਬਾਣੀ ਨਾਮ ਨਾਲ ਜੁੜਨ ਨੂੰ ਵਧੇਰੇ ਮਹਾਨਤਾ ਦਿੰਦੇ ਹਨ। ਗੁਰੂ ਸਾਹਿਬ ਜੀ ਨੇ ਪਰੰਪਰਾਗਤ ਸੰਗੀਤ ਵਿੱਚ ਗੁਰਮਤਿ ਸੰਗੀਤ ਨੂੰ ਵੀ ਸੰਭਾਲਣ ਅਤੇ ਪ੍ਰਚਾਰਨ ਲਈ ਗੁਰਬਾਣੀ ਨੂੰ 31ਰਾਗਾਂ ਵਿੱਚ ਰਚ ਕੇ ਸ਼ਬਦ ਦਾ ਸਾਡੇ ਹਿਰਦਿਆਂ ਅੰਦਰ ਪ੍ਰਕਾਸ਼ ਕੀਤਾ। ਸ੍ਰ: ਸ਼ਹਿਬਾਜ਼ ਸਿੰਘ ਰੰਧਾਵਾ ਨਿੱਜੀ ਸਹਾਇਕ ਸ਼੍ਰੋਮਣੀ ਕਮੇਟੀ ਪ੍ਰਧਾਨ, ਮਾਤਾ ਵਿਪਨਪ੍ਰੀਤ ਕੌਰ, ਕੁਲਵਿੰਦਰ ਸਿੰਘ ਬੈਨੀਪਾਲ ਆਦਿ ਸ਼ਖਸ਼ੀਅਤਾਂ ਉਚੇਚੇ ਤੌਰ ‘ਤੇ ਬਸੰਤ ਰਾਗ ਦਰਬਾਰ ਵਿਚ ਪੁੱਜੀਆਂ। ਪੰਥ ਪ੍ਰਸਿੱਧ ਕਥਵਾਚਕ ਭਾਈ ਸਾਹਿਬ ਭਾਈ ਪਿੰਦਰਪਾਲ ਸਿੰਘ ਜੀ ਨੇ ਗੁਰਮਤਿ ਵਿਚਾਰਾਂ ਦੀ ਸਾਂਝ ਪਾਉਂਦਿਆਂ ਕਿਹਾ ਕਿ ਬਸੰਤ ਰੁੱਤ ਦੀ ਸਮੁੱਚੀ ਬਾਣੀ ਹਿਰਦਿਆਂ ਅੰਦਰ ਪ੍ਰਾਕਿਰਤਿਕ ਖੇੜਾ ਪੈਦਾ ਕਰਦੀ ਹੈ। ਜਿਸ ਤਰ੍ਹਾਂ ਬਸੰਤ ਰੁੱਤ ਵਿੱਚ ਪ੍ਰਾਕਿਰਤੀ ਆਪਣਾ ਰੂਪ-ਰੰਗ ਬਦਲ ਕੇ ਆਪਣੇ ਚਿਹਰੇ ਤੇ ਨਿਖਾਰ ਲਿਆਉਂਦੀ ਹੈ। ਉਸ ਤਰ੍ਹਾਂ ਮਨੁੱਖ ਨੂੰ ਵੀ ਆਪਣੇ ਹਿਰਦੇ ਅੰਦਰ ਆਤਮਿਕ ਵਿਕਾਸ-ਵਿਗਾਸ ਕੇ ਹਿਰਦੇ ਨੂੰ ਨਿਖਾਰਨ ਦੀ ਲੋੜ ਹੈ। ਬਸੰਤ ਰਾਗ ਵਿਚਲੇ ਚੌਪਦੇ, ਦੋਪਦੇ, ਅਸ਼ਟਪਦੀ ਆਦਿ ਵਿੱਚ ਗੁਰੂ ਸਾਹਿਬ ਜੀ ਨੇ ਕੇਵਲ ਤੇ ਕੇਵਲ ਪ੍ਰਭੂ ਭਗਤੀ ਵਿਚ ਲੀਨ ਹੋ ਕੇ ਆਤਮਿਕ ਅਨੰਦ ਪ੍ਰਾਪਤ ਕਰਨ ਲਈ ਜੋਰ ਦਿੱਤਾ। ਇਸ ਵਰ੍ਹੇ ਦੀ ਇਹ ਬਸੰਤ ਰੁੱਤ ਸਭਨਾਂ ਦੀ ਜ਼ਿੰਦਗੀ ਵਿੱਚ ਨਿਖਾਰ ਆਵੇ, ਗੁਰਬਾਣੀ ਕੀਰਤਨ ਵਿਚ ਜੁੜਨ ਵਾਲਿਆਂ ਨੂੰ ਗੁਰੂ ਸਾਹਿਬ ਜੀ ਦੀ ਬਖਸ਼ਿਸ਼ ਪ੍ਰਾਪਤ ਹੋਵਣ ਅਤੇ ਅਨੰਦਮਈ ਜੀਵਨ ਨਸੀਬ ਹੋਵੇ।
